إمتى هنشارك.. إمتى هنقول رأينا.. إمتى هنبني.. إمتى هنوجٍّه عقلنا.. إمتى هنحقق آمالنا.. و إمتى هنفعّل فكرنا.. محتاجين نصحى, نقوم, .نتحرك, نتغير.. نقف على رجلينا ونفكر.. ونسأل نفسنا.. مين اللي هيبني مصرنا
مين هيقــدر غيـرنا.. شباب, عقل, فكر, قوة.. شباب جبار.. يقدر يعدي كل خطوط النار.. علشان أمل.. أمل في بكرة.. بكرة أحسن بينا, .ولينا, ولأجيال جاية بعدينا
محتاجين ننسى اللي خدوا 6 رايح وننسى الحنطور وننسى العنب.. محتاجين نفكر في بكرة.. مش محتاجين هتافات.. مش محتاجين شعارات.. ومش محتاجين حد يعرفنا إيه هو الحل.. لأننا كلنا عارفين الحل.. وكلنا متمسكين بيه.. لكننا محتاجين نفكر في بلدنا.. في مستقبلنا.. في مصرنا.. مصر اللي بتضمنا.. مصر اللي بتحبنا.. مصر اللي مش محتاجة هتافات ولا شعارات ولا مزايدات مننا.. مصر اللي مش مجرد كلمة أو هتاف.. ولكن مصر الكيان اللي عايش في قلوبنا زي ما إحنا عايشين فيها
كلنا شباب مصري.. شباب بيحب مصر.. يقدر يتخطى كل حدود العقل.. لكننا محتاجين لدفعة.. دفعة تنور الطريق لينا.. لا.. دي تنور بس بداية الطريق.. وكلنا ثقة من بلوغ أعلى مراتب الشرف, بل والوصول سالمين إلى نهاية الطريق.. بس ليه الدفعة دي ما تكونش مننا.. ليه ما نشاركش.. ليه ما نفاعلش.. ليه ما نتفاعلش.. وليه إحنا اللي ما نغيرش.. عايزين إحنا اللي نبدأ.. مش عايزين حد يمشينا.. ولا يفرض فكره علينا.. عايزين إحنا اللي نفكر بعقولنا.. وإحنا اللي نبني بأدينا.. والسؤال لينا.. إحنا ليه ما بنشاركش ..؟
هل هنستنى اليوم اللي نشوف فيه ميليشيات مقنعة تنزل لينا في جامعتنا.. وممكن تخش بيوتنا.. وتهد كمان أوقات فرحتنا.. هل هنفضل نسمع من كل اللي بيتكلم.. ونصدق كل اللي بيتقال, من غير ما ندور ولا نسأل ونشارك.
حوالينا أعداء كتير.. أعداء عايزين يخرسونا.. عايزين يمحونا.. وبيتحالفوا مع أعداءنا علينا.. عايزين هما بس اللي يفكروا.. وهما بس اللي يتكلموا.. وإحنا بس اللي نسمع.. حتى لو اضطروا إنهم يعمونا.. أو حتى يحاولوا ينسونا, حب بلدنا وأهالينا.. كلنا عايزين إصلاح.. عايزين تغيير.. تغيير نقدر نحسه, نلمسه, نشوفه بعنينا.. بس ليه الإصلاح ده ما يكونش بأدينا.. إحنا اللي نطلبه أو نعمله أو نشارك فيه.. نتحرك معاه علشان نحقق حلمنا.. وده لازم يبقى مننا ومن نفسنا.. تعالوا سوا نفكر في مشاكلنا وحلها نتكلم فيها ونقول اللي احنا عايزينه, حاسينه.. تعالوا نطلع سوا لفوق
..UR ONLY WAY 4 PROMOTION
